གཟུ་བོ་བློ་ཡི་རལ་གྲི་རྣོན་པོ་དེ།།
གནས་ལུགས་ཀུན་གྱིས་དགུང་ལ་བསྐོར་བསྐོར་བྱེད།།
དོན་དམ་གནས་ལུགས་རྫོགས་པའི་དེ་ཉིད་ལ།།
དུད་དུད་སྙིང་ནས་གུས་ཕྱག་རབ་ཏུ་འཚལ།།
གནས་ལུགས་ཚད་མ་ཇི་ལྟར་བརྗོད་བརྗོད་ཀྱང་།།
བློ་ཡིས་ཡིན་པ་བརྗོད་ན་ཡིན་ཡིན་འདྲ།།
བློ་ཡིས་མེད་པ་བརྗོད་ན་མེད་མེད་འདྲ།།
ཐམས་ཅད་བློ་ཡིས་ཡོད་ཡོད་མེད་མེད་འདྲ།།
གནས་ལུགས་ཚད་མ་ཟེར་བ་ཆ་འཇོག་དཀའ་།།
ཕྱི་དོན་ཡུལ་གྱིས་གནས་ལུགས་དེ་ལ་བརྗོད།།
ཡུལ་ཅན་ནང་གིས་ཚད་མ་དེ་ལ་འཛིན།།
ཕྱི་དོན་ཡུལ་ཅན་ཚུར་ལ་སྣང་ཚུལ་དེར།།
ཡུལ་ཅན་བློ་ཡིས་ཕར་ལ་བཏགས་ཚུལ་བརྗོད།།
ཡུལ་ཅན་ཡུལ་གྱི་ཆ་འཇོག་ཆ་མ་འཚལ།།
ཡུལ་ནི་བློ་ཡི་ཡུལ་ཏུ་བྱ་རུང་བརྗོད།།
དེ་གཉིས་མཚོན་བྱ་མཚན་ཉིད་ཡིན་པ་བརྗོད།།
ད་དུང་ཁྱབ་པ་སྒོ་བརྒྱད་ངེས་ཚུལ་བརྗོད།།
རྫས་ཡོད་ཁྱབ་པར་གསུམ་པོ་ཚང་བར་བརྗོད།།
མཚན་ཉིད་མཚན་བྱའི་གསལ་ཁ་ཧ་ཅང་བདེ།།
མཚོན་བྱ་ཡུལ་ལ་དབྱེ་བ་འདི་ལྟར་བསྟན།།
གཟུང་དང་ཞེན་དང་འཇུག་ཡུལ་རྣམ་པ་གསུམ།།
ཤེས་པ་ཁོ་ན་འཇུག་པའི་ཡུལ་ལ་ནི།།
གཟུང་ཡུལ་སྔོན་འཛིན་དབང་ཤེས་མཚན་གཞི་འཇོག།
ཇི་ལྟར་གཟུང་ཡུལ་ཡིན་པ་དེ་ལྟར་ཤེས།།
ཡུལ་གྱི་དབྱེ་་བའི་བྱེ་བྲག་ཞེན་ཡུལ་ནི།།
རྟོག་པའི་ཡུལ་ལ་བཅོལ་ཏེ་བཞག་པར་བརྗོད།།
གཟུང་ཡུལ་དབང་ཤེས་བརྒྱུད་པའི་སྣེ་མོ་ལ།།
རྟོག་པའི་ཞེན་ཡུལ་འཇོག་པའི་འདོད་པ་སྐྱེས།།
ཞེན་དང་གཟུང་ཡུལ་ཁྱབ་མཉམ་མ་ངེས་སྙམ།།
དེ་ནས་འཇུག་ཡུལ་ཇི་ལྟར་བསྟན་པ་ལ།།
ཚད་མའི་ཡུལ་ལ་ལྟོས་ཏེ་བཞག་པར་བརྗོད།།
གཟུང་དང་ཞེན་དང་འཇུག་ཡུལ་རྣམ་པ་གསུམ།།
དབྱེ་བ་དེ་ལྟར་ཕྱེ་བའི་གཏད་ས་ཡང་།།
ཡུལ་ཅན་བློ་ཡི་འཇུག་ཚུལ་ལྟོས་བ་ལགས།།
ད་ནི་ཡུལ་གྱི་དབྱེ་བའི་མཚན་ཉིད་རེ་རེ་བསྟན།།
འཛིན་པ་ལ་ནི་སྣང་རུང་བ་གཟུང་ཡུལ་ཉིད།།
རྟོག་པས་ཞེན་ཏུ་རུང་བ་ཞེན་ཡུལ་ལོ།།
ཚད་མས་རྟོགས་པར་བྱ་བ་འཇུག་ཡུལ་ཡིན།།
ཁྱད་པར་བསྟན་པའི་བློ་ཡི་འཇུག་ཚུལ་ལོ།།
རང་མཚན་དོན་སྤྱི་མེད་པ་གསལ་སྣང་བཅས།།
གཟུང་ཡུལ་ཡིན་པར་མཚོན་པའི་མཚན་གཞི་ཡིན།།
ཤེས་པར་རང་རྐྱ་འཕེར་བས་སྣང་བ་དེ་།།
རང་མཚན་ཡིན་གྱི་དེ་ལས་ལོག་པ་དེ་།།
མི་གསལ་དོན་་སྤྱི་མེད་པ་གསལ་སྣང་ནི།།
མེད་པའི་རྨི་ལམ་གསལ་བར་སྣང་བ་བཞིན།།
དངོས་བོ་ཞེན་ཡུལ་གཞི་མཐུན་གནས་བ་དང་།།
དངོས་མེད་ཞེན་ཡུལ་གཞི་མཐུན་གནས་བ་ནི་།།
དབྱེ་ངོ་ཞེན་ཡུལ་གང་གི་དབྱེ་གཞི་འཇོག།
ལྐོག་གི་མེ་དང་ནམ་མཁའི་པདྨོ་སོགས།།
ཞེན་ཡུལ་ཡིན་པར་མཚོན་པའི་མཚན་གཞི་འཇོག།
ཚད་མས་རྟོགས་པར་བྱ་བའི་འཇུག་ཡུལ་ལ།།
མངོན་ལྐོག་གཉིས་སུ་ཕྱེ་བའི་དབྱེ་གཞི་ལྡན།།
མངོན་སུམ་ཚད་མས་མངོན་གྱུར་གང་ལ་རྟོགས།།
རྗེས་དཔག་ཚད་མས་ལྐོག་གྱུར་གང་ལ་རྟོགས།།
མངོན་དཔག་མངོན་ལྐོག་དེ་ལྟར་དེ་ལྟར་རེད།།
བརྗོད་བྱ་རྗོད་བྱེད་ལུས་དང་རྣམ་ཤེས་འདྲ།།
གོ་བ་ཐམས་ཅད་བརྡ་ལས་གོ་བར་བྱེད།།
བརྡ་དང་ཐ་སྙད་མིང་ཚིག་ཡེ་གེ་བཅས།།
ཐོལ་གྱིས་ལྟོས་ན་འཁྲུག་འཁྲུག་ཡོད་ན་ཡང་།།
ཡེ་གེ་མིང་ཚིག་བརྗོད་པ་རིམ་གྱིས་བརྗོད།།
མིང་ལ་དབྱེ་ན་དངོས་མིང་བཏགས་མིང་གཉིས།།
ཤིང་དང་ཉི་མ་ལྟ་བུ་དངོས་མིང་དང་།།
ལྷ་ས་སངས་རྒྱས་ལྟ་བུ་བཏགས་མིང་འདོད།།
ད་དུང་མིང་གི་སྒྲ་དང་རིགས་ཀྱི་སྒྲ།།
དངོས་མིང་གང་གི་དབྱེ་ངོ་དགར་བ་ཡིན།།
མིང་གི་སྒྲ་ལ་ལྷས་སྤྱིན་མཚན་གཞི་འཇོག།།
རིགས་ཀྱི་སྒྲ་ལ་མི་ནི་མཚན་གཞི་འཇོག།
འདྲ་བ་རྒྱུ་མཚན་འབྲེལ་བ་རྒྱུ་མཚན་གཉིས།།
བཏགས་མིང་གང་གི་དབྱེ་བའི་དབྱེ་ངོ་ཡིན།།
མིང་ནི་བརྗོད་པ་དེ་ལྟར་དེ་ལྟར་ལགས།།
དཔངས་དང་མཐའ་རྒྱ་མཐོ་དང་ཡངས་བ་ཡི།།
མཐར་ཐུག་གནས་ལུགས་སྟོན་པའི་ཐ་སྙད་ལ།།
རང་ཚོད་རང་བློའི་སྟོབས་ཀྱིས་འཇུག་འཇུག་བྱས།།
འཁྲུལ་དང་མ་འཁྲུལ་ཡོད་པའི་བཅོས་ན་སྤྲོ།།
༢༠༢༢།༩།༩ཉིན་ལ།
No comments:
Post a Comment