ས་སྟེང་གི་སྨྲེང་བ

ལྗོན་ཤིང་འཆི་སྟེ་ལོ་མ་ས་ལ་ལྷུང་།།

འོད་ཟེར་ཉམས་པ་དར་གྱི་ཀློང་དང་འདྲ།།

སྲོག་གི་བམ་རོས་བརྫིས་བའི་ས་སྟེང་ལ།།

མཛེས་སྡུག་དཔལ་གྱིས་སྟོང་བས་ཉམས་རེ་སྡུག

གསད་དང་འཆི་བའི་སྨྲེང་བ་སྟོད་ན་འཕྱོ།།

བཅོམ་དང་འཕྲོག་པའི་མུག་སྐད་བར་ན་མཆེད།།

གཡོ་སྒྱུ་ཁྲམ་པའི་སྐད་ཅོར་སྨད་ན་འཁྱུག།

བདེན་དང་ཞི་བ་ལྡོག་པའི་ས་སྟེང་རྫོབ།།

ཚིམ་པའི་ཁུ་བྱུག་ངག་གི་མཛེས་བ་དབེན།།

སྡུག་གུའི་མེ་ཏོག་ཚོགས་ཀྱི་དྲི་ཞིམ་ཉུང་།།

རྔམ་བརྗིད་ལྷུན་པོ་དག་གི་བརླིང་པ་ཉམས།།

མཛེས་དང་དཔལ་གྱི་སྟོང་བའི་ས་སྟེང་སྐྱོ།།

མཚན་ལ་ཟླ་བ་ཤར་ཡང་ནག་ཡུག་ཡུག།

ཉིན་ལ་ཉི་མ་ཤར་ཡང་གྲང་ཤུར་ཤུར།།

དཀར་ནག་སོ་མཚམས་བྲལ་བའི་ས་སྟེང་ལ།།

ཝ་སྐྱེས་རྒྱལ་བོ་གྱུར་འདི་ཡིད་རེ་མུག།

གཙང་བོ་ཐུར་ལ་བཞུར་ཡང་དྭངས་མས་སྟོང་།།

སྐྱེས་ཤིང་དགུང་ལ་ཟུག་ཀྱང་ལོ་མས་བྲལ།།

སྐྱེས་བོ་ཚོགས་དག་མང་ཡང་བརྩེ་བས་ཁེགས།།

གོར་མོ་རྡོ་ལ་འགྲན་པའི་ས་ཕྱོགས་སྐྱོ།།

རུས་རྐང་མེ་ལ་སྒྲོན་ཡང་དལ་འཇགས་སེ།།

བཀྲོས་སྐོམ་དུས་ལ་བཅད་ཀྱང་ཁུ་སིམ་སིམ།།

རང་སྲུང་ཁེ་ཕན་ཕྱོགས་ན་གྲིམ་རིག་རིག།

གཞན་གྱི་བདེན་པ་བརྫིས་བའི་གནས་ཕྱོགས་མཚར།།

མཚན་མོ་ངུ་སྟེ་སྐར་ཚོགས་ས་ཐོར།།

ཉིན་མོ་བགད་ཀྱང་ཟླ་བ་མཐོང་རེ་དཀོན།།

མེ་ཏོག་ཚོགས་ཀྱི་མགོ་བོ་དོང་ལ་དཔྱངས།།

ཟུར་གྱི་ཚེ་སྲོག་དག་རྣམས་ཉམས་རེ་ཆུང་།།

ས་ཆེན་ཁོག་གི་སྙིང་དམར་་གསོན་པོ་བྲུས།།

མཚོ་ཆེན་སེམས་ཀྱི་སྲོག་གི་རྒྱུ་བ་བཅོམ།།

ཧམ་པའི་མེ་ལྕེ་རྒོད་པའི་ས་སྟེང་ལ།།

བྱམས་པའི་སྦྲང་ཆར་དཀོན་པས་ཞེ་བློ་སྨྲེང་།།

སྟེང་གི་ཁང་ཁྱིམ་ཉི་ཟླ་རག་ལ་ཁད།།

འོག་གི་སྡོད་ཁང་ས་ཡི་སྙིང་བོ་ལ།།

ཐུག་ཐུག་ཡོད་ཡོད་འདྲ་བའི་ཉིན་མོ་འདིར།།

མི་སེམས་གདོན་གྱིས་བསླད་པ་སྣང་བ་སྐྱོ།།

མེ་ཏོག་གང་ཚང་བཞད་དེ་རྒྱས་བར་ཤོག

སེམས་པ་ཐམས་ཅད་བསྐྱེད་ཞིང་ཞི་བར་སྨོན།།

ཆུ་དང་གཙང་བོ་དག་ཅིང་དྭངས་མོར་རེ།།

རི་བོ་སྤང་ལྗོངས་མཛེས་ཤིང་སྡུག་པར་ཤོག།

ཚེ་སྲོག་ཕྲ་མོ་དག་ཀྱང་འཚོ་བར་སྨོན།།

བདེན་པའི་ཉི་ཟེར་སྒྲིབ་པ་བྲལ་བར་ཤོག།

འཛུམ་གྱི་ཆུ་མོ་དུས་བཞིར་འཁྱགས་མེད་སྨོན།།

གཤོག་འགྱུར་རྣམས་ལ་རང་དབང་ཐོབ་པར་ཤོག།

འཚོ་བར་གླུ་དང་གར་གྱིས་ཁྱབ་པར་ཤོག།

ས་སྟེང་སྐྱིད་པའི་རང་ཁྱིམ་གྱུར་བར་སྨོན།།

༢༠༡༠།༣།༢༨་ཉིན་ལ་།