ཆར་གྱིས་སྦར་བའི་མེ།

ཆར་དུས་སུ་ངའི་མིག་ཟུང་སྒེའུ་ཁུང་ཁ་ན་ཡོད།

ཆར་དུས་སུ་ངའི་སེམས་པ་ལོ་མའི་སྟེང་དུ་ཡོད།-------ཁ་བྱང་གི་འགྲེལ།

ཆར་བ་བབས།།     སེམས་པ་སྐྱོ།།      ལོ་མ་བྲན།།            ངོ་གདུང་བརླན།།

རླུང་བུ་ལྡིང་།།      སྐྲ་ལོ་གཡོས།།       ཆར་སྒྲར་བླགས།།     གླུ་མ་གོ།

སྨུག་པ་འཐིབས།།  མིག་རྒྱ་བསྒྲིབས།།   རྒྱང་མི་མཐོང་།།    གམ་མ་གསལ།།

འོད་ཟེར་དྲན།།    རྒྱང་རིང་དྲན།།      སང་ཉིན་དྲན        དགོད་སྒྲ་དྲན།།

 

ཆར་བ་བབས།།         གྲོག་ཚང་ཁུར།།     རླུང་བུ་གཡུགས།།      བྱིའུ་ཚང་གཏོར།།

ཡལ་འདབས་གཡོ།།    ལོ་མ་ཟགས།།      བླ་སེམས་བསྒུལ།།       ཡིད་མཚོ་དཀྲིགས།།

གཉིད་མ་ཁུགས།།     ཟས་མ་ཞུ།།          གྲོད་ཁོག་བཤའ་།།      སྐྱུག་མེར་ལངས།།

ཨ་མ་དྲན།།            རྩམ་པ་དྲན།།         རྩྭ་ཐང་དྲན།།           རི་ཆུ་དྲན།།

གནམ་ངོ་རུབ།།    སེམས་རྒྱ་བཀླུབས།།   གཤོག་འགྱུར་ཡལ།།   རང་དབང་བརླགས།

ཆར་བ་ཐིགས།།     སེམས་པ་ཕུག།         བགྲོད་ལམ་བཀག།    དོན་མ་འཁྱོངས།།

ཆར་ཆུ་བཞུར།།     རྒྱ་མཚོ་བསྙོགས།།       དར་ལྕོག་ཐེད།།        རྫ་རི་བཤིག།

ཉི་འོད་བསྐལ།།     ཉིན་མཚན་འཁྱགས།།  རང་དབང་དྲན།།        གངས་རི་དྲན།།

གནམ་ས་འདྲེས།།     གློག་དམར་འཁྱུགས།     ས་གཞི་བརྫིས།།        ལྷུན་པོ་ཉིལ།།

ཆར་རླུང་འཚུབ།།     མེ་ཏོག་ཁུར།།           གནོད་འཚེ་འཕེལ།།     བརྩེ་བ་བྲི།།

དཀར་ནག་ལྡོག།     བདེན་པ་བཀུམས།།      ཞི་བདེ་བཅོམ།།         མི་གཤིས་རྒུད།།

ཉི་ཟླ་དྲན།།            གཏན་ཚིགས་དྲན།།       བདེ་སྐྱིད་དྲན།།        ཡ་རབས་དྲན།།

ཆར་བ་བབས།།     གཤེར་གྱིས་ཁེངས།།        ཡིད་སེམས་མུག།།      སྡོད་མ་ཚུགས།།

མེ་ལ་སྒྲོན།།          མཆི་མས་གཡོགས།།        གནམ་ལ་ཅེར།།        འོད་མ་མཇལ།།

སེམས་པ་འབར།།    གྲིབ་བསིལ་བཙལ།།        ལོ་མས་བྲལ།།          ཕུགས་མ་རྙེད།།

དཔའ་བོ་དྲན།།      དྲོད་ཁོལ་དྲན།།             ལྗོན་པ་དྲན།།           ཕ་ས་དྲན།།

ཆར་བ་བབས།།      དྲོད་ཁ་ཉམས།།             ལོ་མ་ཐོར།།           རླུང་གིས་ཁུར།།

མཆི་མ་འཁོར།།      སེམས་འཕང་ཞུམ།།         ཞེ་བློ་སྨྲེང་།།          ཁོ་ཐག་ཆད།།

ཟེགས་མ་འཕྱོ།།       མཐོང་ལམ་བཅད།།         གོམ་སྣེ་འཁྱོགས།      མདུན་ལྗོངས་མོག།

ཡར་ཀླུང་དྲན།།      སྲོང་བཙན་དྲན།།            ལྷ་ས་དྲན།།             རང་ཁྱིམ་དྲན།

ཆར་བ་བབས།།       ནམ་མཁའ་བཤུམས།།     ས་གཞི་བཀབ།།       རི་ཀློང་བཏུམས།། 

དྲན་གདུང་ལྕི།།       གཞི་ན་སྒུག།              བྱེས་ཀྱིས་འཁྲེང་།    ལོ་ཟླ་རྫོགས།།

ཆར་ཆུ་ཐོར།།          གང་སར་འཁྱམས།།     གཞི་མ་རྙེད།།         ལོག་ན་བསམ།།

སེམས་ཁ་འཁྲིགས།།   གདོང་མདུད་བརྒྱབས།།   འཚུབ་ཆ་ལངས།།       ལམ་ཁ་བོར།།

ཆར་བ་བབས།།          ཚོར་བ་སྦངས།།        རྨི་ལམ་འཁྲིགས།།       ཉིན་མོ་དྲན།།

སྒྲོག་གིས་བསྡམས།།     ལྕགས་ཀྱིས་སློག།     མདའ་ཡིས་བསད།།      གསོན་པོ་དྲན།།

ཕ་ཁྱིམ་བསྐྱུར།།         མཐའ་ལ་མྱུལ།།        ཉི་ཟླ་ཉམས།།              མེས་པོ་དྲན།།

ཚེར་མ་ཟུག།            རྐང་པ་རྨས།།          ཁྲག་དམར་འཛགས།།    ལམ་ཆེན་དྲན།།

ཆར་བ་བབས།།         བརྩེ་དུང་དྲན།།       ཟེའུ་འབྲུ་བརྣོགས།།    སྙིང་དམར་དྲན།།

དུག་སྦྲང་འཕྱུར།།       འཇོལ་མོ་དྲན།།       ལུས་ཕུང་རིད།།         རྨི་ལམ་དྲན།།

ཆར་རླུང་གཡུགས།།      མེ་ཏོག་དྲན།།         མཆོད་མེ་གཟིམ།།       མེ་ལྕེ་དྲན།།

གཤོག་ཟུང་འབྱར།།      མདུན་ལྗོངས་དྲན།།   མིག་ཟུང་མོག།།     འོད་སྣང་དྲན།།

  

2012—08—26་ལ་རྫོགས་པར་བྱས། ༼ཝཱ་ར་ཎ་སི་ནས༽