ལོ་མའི་འོག་ནས་ངུ་ཤུམ་བྱས་པ།
༢༥།༡༠།༢༠༡༢མཚན་མོར།

མ་གང་ཟླ་བའི་མཚན་གུང་ལ།།
ལོ་མའི་འོག་ནས་ཁེར་སྡོད་བྱས།།
ཐ་མག་གཅིག་གི་སེམས་གསོ་ཡིས།།
སེམས་ཁ་བདེ་བའི་ཐབས་ལ་འབད།།

མགོ་བོ་དགྱེས་ནས་གནམ་ལ་ཅེར།།
སྐར་མ་ཆ་བོ་མོག་མོག་རེད།།

ས་ལ་ལྷུང་བའི་སྐར་འདའ་དེ།།
ཤི་བོ་སུ་ཡི་རྣམ་ཤེས་ལགས།།


ལོ་མའི་གསེབ་ན་འབའ་འབུ་གྲགས།།
སྐྱོ་བ་སྡུག་གི་སྨྲེ་ངག་འདྲ།།
ཕ་སའི་གྲོང་ན་མེ་ལྕེ་འབར།།
སེམས་རྩ་མེ་ལ་བཏབ་པ་འདྲ།།

སྲོག་ཅིག་ཡོད་པ་མེ་ལ་སྦར།།
མ་ཅིག་ཡོད་པ་ཡུགས་མོར་གྱུར།།
བུ་ཞིག་ཡོད་པ་དྭ་ཕྲུག་བཏང་།།
ཡང་སྙིང་སུ་ཡི་དོན་དུ་ཡིན།།

མེ་ལ་གཅིག་སྒྲོན་གཉིས་སྒྲོན་བྱས།།
སེམས་ལ་རེ་རེ་ངང་ནས་དྲན།།
ཡིད་སེམས་སྨག་གིས་བསྒྲིབས་ཏེ་སོང་།།
ངུ་འདོད་སྙིང་ནས་ཤུགས་ཀྱིས་སྐྱེས།།

དགུང་གི་ཟླ་བ་མ་གང་མས།།
སྨག་གི་རྔམ་ཁ་མ་འཇོམས་ཐལ།།
རྒྱང་ན་བཞུད་པའི་མེ་འཁོར་ལགས།།
སེམས་ཀྱི་སྡུག་འདི་ཁྱེར་རོགས་ཨང་།།

(ཧི་་་་ཧིན་་་་་་་་ཧི་་་་་་་ཧུ་་་་་)ངུ་ཤུམ་བྱེད་པའི་སྒྲ།