དེ་རིང་གྲུ་ཆུང་ལ་བསྡད་དེ་གངྒར་བརྒལ།

༡

གངྒ་ལགས།

ཁྱེད་རང་ཇི་འདྲའི་ལྷོད་ཅིང་འཇགས་ཨང

ཁྱེད་ཀྱི་བཞུར་རྒྱུན་ནི་ཇི་འདྲའི་བག་ཕེབས་ཤིག

ཁྱེད་ནི་ཧ་ལམ་ལྟེམས་མེར་འཁྱིལ་བའི་རྫིང་བུ་ཞིག་དང་འདྲ

རང་གཤིས་འདི་སུ་ཞིག་གིས་ཁྱེད་ལ་སྩལ་སོང་ངམ

ཁྱོད་ཀྱི་འབབ་རྒྱུན་ནི་འདི་འདྲའི་སོས་དལ་བག་ཡངས་ཤིག་ཡིན་དོན་ཅི

གངྒ་ལགས། གངྒ་ལགས གངྒ་ག་ལགས

༢

སེམས་པ་འདི་རྒྱུགས་ཆུ་ཞིག་དང་འདྲ་བར

ཤག་ཤག་དང་ལྷོག་ལྷོག་ཏུ་བཞུར

གངྒ་ལགས

བདག་གིས་ས་ཁྲ་སློག་ཏེ་ཁྱོད་ཀྱི་རྒྱབ་ལྗོགས་སྔོག

བདག་གིས་གླེགས་བམ་ཁྲོད་ནས་ཁྱེད་ཀྱི་ནང་ཁོག་བཙལ

སེམས་པ་གངྒ་ལ་བརླན་དུས

བདག་གིས་གངྒ་ཀློང་ནས་ཀི་རིང་ཤོར

༣

ཨོ། བདག་གིས་ཤེས་སོང

ཁྱེད་ཀྱི་མགོ་ཁུངས་གངས་རི་དང

ཁྱེད་ཀྱི་འབབས་ས་རྫ་གསེང

ཁྱེད་ཀྱི་བཞུར་ས་སྤང་ལྗོངས་རེད་ལགས

མདོར་ན་ཁྱེད་ནི་གངས་རའི་ཨ་མའི་བྱང་ཁོག་ནས་ཐོན་པ་ཞིག་རེད

༤

དེ་བས། ཁྱེད་རང་མཐོ་པོ་བྲག་ནས་སྤོབས་པས་བསས་ཤིང

དམའ་མོ་ལུང་ནས་མཛེས་བས་བཞུར། 

ང་རྒྱལ་དང་མཛེས་སྡུག

གཡང་གཟར་ནས་ཁྱེད་རང་ཆལ་ཆིལ་དུ་བབས་པས་རྦབ་ཆུ་རུ་གྱུར

རྫ་གསེང་ནས་ཁྱེད་རང་ལྷུང་ལྷུང་དུ་བབས་པས་རྫ་ཆུ་རུ་གྱུར

སྤང་ཁ་ནས་ཁྱེད་རང་ཤག་ཤག་ཏུ་བཞུར་བས་རྒྱུགས་ཆུ་ལ་གྱུར

སྐབས་དེར། ཁྱེད་ནི་དཔའ་སྤོབས་དང་སྟོབས་ཤུགས་ཀྱིས་ཁེངས་པ་ཞིག་རེད་ཨང

སྐབས་དེར། ཁྱེད་ཀྱི་བཞུར་རྒྱུན་དང་འབབ་རྒྱུན་གྱིས་སུ་ལ་ཡང་མགོ་བོ་སྒུར་མེད

ཆལ་ཆིལ་དུ། ལྷོག་ལྷོག་ཏུ། ཆལ་ཆིལ་དུ། ལྷོག་ལྷོག་ཏུ།

ཆལ་ཆིལ་དུ། ལྷོག་ལྷོག་ཏུ། ཆལ་ཆིལ་དུ། ལྷོག་ལྷོག་ཏུ།

 

༥

གངྒ་ག་ལགས

ཁྱེད་རང་ཐང་ཆད་སོང་བ་ཡིན་ནམ

ཁྱེད་རང་དཔའ་ཞུམ་སོང་བ་ཡིན་ནམ

ཡང་ན། ཁྱེད་ཀྱིས་རང་ཉིད་ཀྱི་ཡོད་ཚད་གཏིང་བརྗེད་ཀྱིས

ཕ་རོལ་པའི་གྲུ་གཟིངས་རྒྱབ་ལ་ཁུར་ཏེ་ཕར་འགྲོ་ཚུར་འོང་ཁོ་ན་བྱེད་ཀྱིན་ཡོད་དམ

ཡང་ན། ཁྱེད་རང་རྫ་གསེང་བྲག་གསེང་ནས་བབས་བབས་མཐར

འདི་ནི་ཁྱོད་ཀྱི་མཐའ་མཇུག་གི་གནས་མལ་དང་དམ་བཅའ་དེ་ཡིན་ནམ

གངྒ་ག་ལགས གངྒ་ག་ལགས གངྒ་ག་ལགས

༦

དེ་རིང་། ང་གྲུ་ཆུང་ཞིག་ལ་བསྡད་དེ་གངྒའི་ཚུར་རོལ་དང་ཕ་རོལ་ལ་བརྒལ

སང་ཉིན། ང་རང་གངྒ་ལ་འཐིམས་ཏེ་རྒྱ་མཚོར་འདྲེས་དགོས།

27.1. 2013