ལོ་མ་ཐར་ཐོར།

སྲོད་ཁ་ལ་རླུང་ནག་པོ་ཞིག་གཡུགས་སོང

འབྲུག་སྒྲ་ལྡིར་ཞིང་དྲག་ཆར་བབས་ཏེ་སེར་བ་ཡང་བབས

ཞོགས་པ། ང་རང་སྔ་མོ་ནས་སད་བྱུང

ཁོར་ཡུག་ལ་གཏོར་བའི་ལོ་མ་དང་འདབ་མ

ད་དུང་ཡལ་ག་ཆག་རོ་སོགས་ཀྱིས

ཞོགས་པ་འདིར་མྱ་ངན་གྱི་མིག་ཆུ་བསྐྱིལ་འདུག

ནགས་བྱིལ་དང་བྱིའུ་ཡིས་ཀྱང་མགོ་བོ་སྒུར་ཏེ་སྨྲེང་གླུ་ལེན

 

ལོ་མ་ནས་བསྐྱོད་པའི་ཤག་སྒྲ་ཁོ་ནས

ངའི་སྙིང་ཁམས་ཚ་བེར་སེ་བཏང འུར་ཕྱོགས་སེ་བཏང

 

སེར་བ་དེ་མདེའུ་ཞིག་དང་འདྲ

ཆར་བ་དེ་ཨ་རག་ཅིག་དང་འདྲ

འབྲུག་སྐད་དེ་འདྲེ་སྐད་ཅིག་དང་འདྲ་ཨང

 

མེ་ཏོག་ལ་དགའ་ཞིང་ལོ་མ་ལ་དུངས་མཁན་ཚོས

འབུད་ཤིང་གྲ་སྒྲིག་བྱས་ཏེ་དགུན་གཞུང་བརྒལ་བའི་སྟ་གོན་བྱེད

ཡིན་ཡང་། ཉི་མ་ག་ཚོད་ཅིག་གིས་སེར་བ་བཞུ་བར་བྱེད་ཐུབ

༢༠༡༣་།༡།༡༩ ཉིན།