མུན་པ་ལ་རྒོལ་བ།
༡
མེ་ཏོག་དང་གཤོག་སྒྲོ་སོག་ལེ་ཡི་ཁ་ལ་ལྷུང་།
རྣམ་ཤེས་ཀྱི་མགྲིན་པ་རྩ་ནས་བསྒགས།
དབང་ཆོག་ཆོག་གི་ནམ་མཁའ། མངོན་ཆོག་ཆོག་གི་རྨི་ལམ།...
དབང་ཆོག་ཆོག་གི་རྩྭ་ཐང་། མངོན་ཆོག་ཆོག་གི་བྲང་ཁོག

བཅད་སོང་། གཏུབས་སོང་། གཞོགས་སོང་། བྲེག་སོང་།
རླུང་གིས་གཏོར་སོང་། ཐོག་གིས་གསིལ་སོང་། གྲི་ཡིས་གཤགས་སོང་།
རྡུང་སོང་། བཅག་སོང་། གསད་སོང་། བཙུར་སོང།
མེ་ལ་བསྲེགས་སོང་། ཆུ་ཡིས་བསྣུབས་སོང་། རྡོ་ཡིས་བརྡུངས་སོང་།
མཐའ་འཁོར་ན་མཆེ་བ་གཙིགས། སེམས་ཁོང་ན་རྦ་ཀློང་འཁྲུགས།
མཐའ་འཁོར་ན་རླུང་དམར་འཚུབ། སེམས་ཁོང་ན་རྦ་རྡོ་ཉིལ།

༢
མགོ་བོ་མཐོན་པོར་སྨག་གི་རི་བོ་བརྫངས།
མགོ་བོ་གྱང་ལ་ཡང་ཡང་བརྡེབས།
ལམ་གྱི་གོམ་སྣེར་འདམ་གྱི་མཚོ་ནག་བསྐྱིལ།
རྐང་པ་ས་ལ་ཡང་ཡང་བརྡེབས།

དུས་ཚོད། དུས་ཚོད་ཀྱི་ཁ་གདང་།
རྣམ་ཤེས། རྣམ་ཤེས་ལ་ས་རུབ།
ནམ་མཁའ། ནམ་མཁའ་ནས་ཉི་ཟླ་ནུབ།
བྲང་ཁོག བྲང་ཁོག་ལ་ཆབ་རོམ་འཁྱགས།
སུ་ཞིག་གི་ཉེས་པ་ཡིན། སུ་ཞིག་གི་རྒྱུ་འབྲས་ཡིན།
༣
དཔལ་འབར་ཁྱེར་ནས་མུན་ནག་ལ་རྒོལ་དུ་འགྲོ
འོད་ཟེར་ཁྱེར་ནས་གྲང་ངར་ལ་རྒོལ་དུ་འགྲོ
ང་མ་ཤི་ན་འོད་སྣང་ཡིན། ཁྱོད་མ་ཤི་ན་དྲོད་འཇམ་ཡིན།
འུ་ཚང་ལ་མེད་པ་དེ་ཡིན། འུ་ཚང་ལ་མཁོ་བ་དེ་ཡིན།

དབང་ཆོག་ཆོག་གི་ནམ་མཁའ། མངོན་ཆོག་ཆོག་གི་ནམ་མཁའ།
མེ་ལ་བསྲེགས། ཆུ་ཡིས་བསྣུབས། རྡོ་ཡིས་བརྡུངས།
དཔལ་འབར་ཁྱེར་ནས་མུན་ནག་ལ་རྒོལ་དུ་འགྲོ
འོད་ཟེར་ཁྱེར་ནས་གྲང་ངར་ལ་རྒོལ་དུ་འགྲོ
༢༣།༠༨།༢༠༡3