ལག་མཐིལ་ལ་བྲིས་པའི་ཡི་གེ།

༼ཉུལ་རོ་རྡོག་སྒྲིལ།  ༽

ཐོར་སོང་བའི་རྩྭ་ཉག་རེ་རེ་ངས་རྡོག་ཏུ་བཏུས་ཏེ

རང་ཚོད་ཀྱིས་ཕྱག་མ་ཆུང་ཆུང་ཞིག་བཟོས

གྲུ་ག་དང་ནག་ཐུག་ཡོད་ཚད་ལ་གད་བརྡར་བྱེད་དུས

ང་གཞི་ནས་འཁྲུས་ཁང་ནས་ཐོན་པ་དང་འདྲ་སོང

༼ལུགས་ལུགས་སྲ་བཟོ། ༽

འདམ་འབག་གིས་ང་ལ་ཇི་ལྟར་ལུགས་སུ་འགྲོ་དགོས་བར་བསྟན

དེ་རི་བོ་ལ་མི་གྲུབ་པའི་སེམས་ཀྱི་གཏན་ཚིགས་དེས

ཚ་ལམ་ལམ་གྱི་ཉིན་གུང་ཞིག་ལ

འདམ་འབག་གིས་རི་བོ་བརྩིགས

༼ ཉོབ་པ་སྨུག་དྭངས།  ༽

ས་གཞི་ལ་སྨུག་པ་ཡིས་བཀབ་བྱུང

ཉོབ་སྣང་ཡང་དོན་གྱི་ཚོར་སྐྱེན་ཞིག

སྨུག་པ་དྭངས་བྱེད་ཀྱི་ལམ་གྱི་མཆོག་ནི

སྨུག་པ་ནས་མདུན་དུ་བསྐྱོད་པ་དེའོ

༼ལྷོད་པོ་ཚགས་དམ། ༽

སྒྱེ་ཁ་ལྷོད་སོང་བས་ནས་འབྲུ་ཐང་ལ་ཐོར

རྨི་ལམ་མེད་པའི་མཚན་མོ་ནི་ཇི་འདྲའི་ནག་ཅིང་འཁྱགས་པ་ལ

ཚགས་དམ་མ་དམ་གྱི་ཧེ་བག་གིས

ད་གཟོད་ཤར་ཕྱོགས་དང་ལྷོ་ཕྱོགས་ཀྱི་ཁྱད་པར་བྱུང

༼འདག་འདག་གྲིམ་པ། ༽

འཐེན་ཐུག་བདུར་ནས་འདག་འདག་ཆགས་སོང

སྙིང་སྟོབས་ཀྱི་གྲིམ་ཤ་མ་ལྷོད་ན

ད་དུང་། འཐེན་ཐུག་དང་རྒྱ་ཐུག

མོག་མོག་ལ་སོགས་ག་རེ་བཟོ་བཟོ་རེད

༢༠།༡༠།༢༠༡༣ དགོང་མོར།